کولمبو ، 13؍فروری(ایس او نیوز؍آئی این ایس انڈیا)سری لنکا کی فوج میں تطہیر کے عمل کے دوران ایک ہی دن تقریباً 550بھگوڑے فوجیوں کو گرفتار کر لیا گیا ہے۔ حکومت کی جانب سے عام معافی کی ایک اسکیم کے تحت تقریباً تینتالیس ہزار بھگوڑے فوجیوں کو کورٹ مارشل سے بچنے کے لیے واپس آنے اور دوبارہ فوج میں شمولیت یا باقاعدہ قانونی سبکدوشی کی ترغیب دی گئی تھی۔ یہ مہلت، جس سے نو ہزار سے زیادہ افسروں اور جوانوں نے فائدہ اٹھایا، دسمبر میں ختم ہو گئی تھی۔ بریگیڈیئر روشن سنیوی رتنے کے مطابق فوج کی ایک کارروائی کے دوران پانچ سو چھیالیس فوجیوں کو گرفتار کیا گیا، جو ایک روز میں گرفتار کیے جانے والوں کی ریکارڈ تعداد ہے۔ سری لنکا کی فوج کو گزشتہ کئی برسوں سے اس مسئلے کا سامنا ہے کہ سپاہی مختلف وجوہات کی بناء پر فوج چھوڑ کر بھاگ جاتے ہیں۔